Се повеќе се дискутира за витаминот Д и неговата важност. Откриваме колку е витален за телото, како и штетата предизвикана од недостаток.
Неодамнешните студии покажаа дека едно од седум лица страда од недостаток на витамин Д, што ги натера многу лекари да предупредат за „епидемија што се игнорира“.
Затоа, изложеноста на сончева светлина – за да му се овозможи на телото да произведува доволно витамин Д – и внесот преку исхраната се клучни.
Витаминот Д е неопходен за апсорпција на калциум, здравје на коските и срцето и правилно функционирање на телото.
Најновото истражување, презентирано на 20-тиот Европски конгрес за ендокринологија, покажува дека недостатокот на витамин Д е поврзан и со абдоминалните масти и со дебелината.
Тим холандски истражувачи откри дека абдоминалните масти кај жените се поврзани со ниски нивоа на витамин Д, додека кај мажите, недостатокот на витамин Д е поврзан со масти во црниот дроб и абдоменот.
Истражувачите објаснуваат дека врската помеѓу зголемените абдоминални масти и пониските нивоа на витамин Д сугерира дека лицата кои се борат со прекумерна тежина се изложени на поголем ризик од развој на недостаток на „витаминот на сонцето“. Во студијата учествувале неколку илјади мажи и жени на возраст од 45 до 65 години.
Истражувањето се фокусираше на вкупните телесни масти, мастите на стомакот и мастите околу органите и црниот дроб.
Професорката Ирена Чолиќ Бариќ, раководител на Лабораторијата за нутриционистички науки на Факултетот за прехранбена технологија и биотехнологија, Универзитет во Загреб, ја објаснува важноста на „витаминот на сонцето“:
„Витаминот Д е неопходен за здрави коски, бидејќи придонесува за искористување на калциумот од храната и негово инкорпорирање во коските. Соодветниот статус на витамин Д е поврзан со нормална мускулна и кардиоваскуларна функција. Исто така, е утврдено дека го намалува ризикот од дијабетес и штити од инфекции.“
Добрата вест е дека можеме да го зголемиме внесот на витамин Д преку исхраната.
Според професорката Цолиќ Бариќ, мрсните риби – како што се лососот, туната и скушата – и рибиното масло се одлични извори на витамин Д; извори на оваа важна хранлива материја се и прехранбените производи збогатени со витамин Д, како што се маргаринот и млекото (кои често се дел од појадокот).
Се проценува дека дури една милијарда луѓе ширум светот страдаат од недостаток на овој витамин, а Европската агенција за безбедност на храна препорачува концентрација од 50 nmol/L како соодветна за сите групи од населението. Овие податоци се собрани во услови на минимална синтеза на витамин Д, односно при минимална изложеност на сонце.
wish.hr
